Roráte cæli désuper

Roráte cæli désuper,

et nubes pluant iustum.

1.Ne irascáris, Dómine,

ne ultra memíneris iniquitátis:

ecce cívitas Sancti facta est desérta:

Sion desérta facta est:

Ierúsalem desoláta est:

domus sanctificatiónis tuæ et glóriæ tuæ,

ubi laudavérunt te patres nostri.

2.Peccávimus, et facti sumus tamquam immúndus nos,

et cecídimus quasi fólium univérsi:

et iniquitátes nostræ quasi ventus abstulérunt nos:

abscondísti fáciem tuam a nobis,

et allisísti nos in manu iniquitátis nostræ.

3.Vide, Dómine, afflictiónem pópuli tui,

et mitte quem missúrus es:

emítte Agnum dominatórem terræ,

de Petra desérti ad montem fíliæ Sion:

ut áuferat ipse iugum captivitátis nostræ.

4.Consolámini, consolámini, pópule meus:

cito véniet salus tua:

quare mœróre consúmeris,

quia innovávit te dolor?

Salvábo te, noli timére,

ego enim sum Dóminus Deus tuus,

Sanctus Israel, Redémptor tuus.