Psalterium · Vulgata Clementina
Salmo 61
Nonne Deo subiecta erit anima mea
Numeração da Vulgata · Sl 61 (62 na numeração hebraica)
Coro I à esquerda · Coro II recuado
marcas de salmodia em revisão
versículo 2: Nonne Deo subiecta erit anima mea? ab ipso enim salutare meum.
versículo 3: Nam et ipse Deus meus et salutaris meus; susceptor meus, non movebor amplius.
versículo 4: Quousque irruitis in hominem? interficitis universi vos, tamquam parieti inclinato et maceriæ depulsæ.
versículo 5: Verumtamen pretium meum cogitaverunt repellere; cucurri in siti: ore suo benedicebant, et corde suo maledicebant.
versículo 6: Verumtamen Deo subiecta esto, anima mea, quoniam ab ipso patientia mea:
versículo 7: quia ipse Deus meus et salvator meus, adiutor meus, non emigrabo.
versículo 8: In Deo salutare meum et gloria mea; Deus auxilii mei, et spes mea in Deo est.
versículo 9: Sperate in eo, omnis congregatio populi; effundite coram illo corda vestra: Deus adiutor noster in æternum.
versículo 10: Verumtamen vani filii hominum, mendaces filii hominum in stateris, ut decipiant ipsi de vanitate in idipsum.
versículo 11: Nolite sperare in iniquitate, et rapinas nolite concupiscere; divitiæ si affluant, nolite cor apponere.
versículo 12: Semel locutus est Deus; duo hæc audivi: quia potestas Dei est,
versículo 13: et tibi, Domine, misericordia: quia tu reddes unicuique iuxta opera sua.
doxologia: Gloria Patri, et Filio, et Spiritui Sancto.
doxologia: Sicut erat in principio, et nunc, et semper, et in sæcula sæculorum. Amen.